鄭慕智（中）身兼港視同中移動董事，幫王維基（左）同中移動董事奚國華（右）做中間人的話，交易都順利啲。插圖︰詹震寰 

八卦陣

鄭慕智幫魔童　圓電視夢

香港電視（ HKTV）上星期五正式翻生，主席王維基宣布收購咗中國移動旗下一間子公司，用呢間公司嘅流動廣播頻譜，提供三至五條直播頻道播放港視節目，明年七月一日啟播。

689無理封殺港視辣㷫廣大市民，令到北京相當頭痕，為咗疏導民憤，不得不暗地裡做嘢，更不惜動用中移動呢間央企級公司，以圓魔童電視夢。江湖傳聞，全國政協委員鄭慕智得知北京心意，以佢身兼中移動同香港電視董事嘅身份，適時地幫呢單「刁」牽線，促成呢個各方皆贏、 CY獨憔悴嘅方案。
被譽為「公職王」嘅鄭慕智係胡百全律師事務所首席合夥人，九七年 CTI年代已經做城市電訊董事，○三年仲做埋中國移動獨立非執行董事。當年同王維基一齊做中大學生會幹事、又同鄭慕智同期入去 CTI做非執董嘅陳健民，估計佢哋係當年喺自由黨相識，佢覺得鄭慕智好 experienced（經驗）同好有 knowledge（知識），但唔肯評論鄭同魔童嘅關係。
中移動當年投得頻譜，設置咗七個發射站，舊年成立 UTV開設八條頻道，但今日都無實際俾公眾透過大氣電波接收節目內容。根據港視星期五交俾港交所嘅文件， HKTV買返嚟間中移動子公司淨負債超過二千萬，舊年淨虧蝕一千七百萬，所以喺阿爺首肯之下賣走間公司，其實兩邊都有着數。

(繼續閱讀...)